الابتلاء

امبارح قابلت واحده اعرفها من الصيدليه وكنت بقالى فتره ما شفتهاش فسئلتها عن اخبارها فاستغربت جدا من كلامها بقولها بقالى فتره ما شفتكيش قالت لى اه اصل جوزى كان تعبان شويه قلت لها خير مش بسيطه ان شاء الله قالت لى الحمد لله جت له جلطه فسكت شويه وقلت لها طيب ان شاء الله تكون الجلطه فى مكان سهل تتعالج قالت لى الحمد لله فى المخ فحاولت اهون عليها قلت لها طيب مش هو الحمد لله بيقدر يتكلم قالت لى الحمد لله فقد النطق خالص سكت حاولت تانى اهون عليها قلت لها طيب الجلطه ما سببتش شلل قالت لى الحمد لله عملت شلل فحاولت برضو اهون شويه قلت لها طيب مش الحمد لله الشلل نصفى يعنى بيقدر يحرك طرفين قالت لى الحمد لله هو شلل كلى وما بيعرفش يحرك الاربع اطراف قلت لها طيب والاكل والشرب بيقدر ياكل طبيعى قالت لى الحمد لله متعلق له محاليل للاكل واستره والحمد لله عايش وبخير ولسه املنا فى ربنا كبير قلت لها ربنا يشفيه ويعفو عنه وبعد ما مشيت قعدت افكر سبحان الله عندها كل ده والبسمه ما فرقتهاش والرضا والحمد مالى كلامها وسئلت نفسى ياترى الناس دى ايمانها زياده ووصلها لكل الرضا دا ولا احنا اللى لسه جوانا نقص فبيهزنا اى موقف حتى لو كان صغير وفعلا بشر الصابرين الذين اذا اصابتهم مصيبه قالوا انا لله وانا اليه راجعون ربنا يصبرها ويقوى ايمانها وايمانا احنا كمان وحقا من رأى ماعند الناس هان عليه ما عنده

اللهم انى احمدك حمدا كثيرا كما ينبغى لجلال وجهك وعظيم سلطانك

مواقف لا تنسى 4

معيد الجراحه

ما اقدرش انسى لما كنت فى يوم فى سكشن الجراحه وحسيت انى مصدعه اوى وعارفه ان السكشن بيبقى كله كلام وشرح مستفيض اوى وزاد كمان الطين بله انى لقيت المعيد اللى ما بيفصلش طول التلت ساعات وياريتنى فى الاخر بطلع بجمله واحده مفيده فكان لازم اقرر بسرعه انى اعمل اى حاجه عشان اخرج من السكشن واروح بيتنا وبدء يتكلم وعدت اول ساعه وانا مش قادره لازم اروح قلت لصاحبتى هستأذن واروح قالت لى لا دا انتى بتحلمى مدام دخلتى السكشن مش هيرضى ابدا انك تمشى فكان لازم كتكوته تستعمل الطرق الجهنميه فى حل المشاكل ا لتعليميه افتكرت ان المعيد دا اكتر حاجه تضايقه فى الدنيا الكلام اثناء شرح سعادته وممكن يطرد اى حد كبرت فى دماغى فى الرست اللى بعد اول ساعه انى لازمن وحتما اطرد انهارده وفرصه اروح ساعتين بدرى فاتفقت مع صحباتى انى هتكلم معاهم وهم ما يردوش عليا وبعدين هو يشوفنى فيطردنى قالوا لى ايه دا ياكتكوته انتى هتستندلى وتسبينا فى السكشن دا قلت لهم معلش المره دى بس قالوا لى يا نطرد سوا يا نقعد سوا قلت لهم معلش انا عايزه اروح اخدمونى وبعدين اطردوا على راحتكم واحده واحده على الاقل ترحموا باقى السكشن من الشرح المتواصل اللى ما بيفهموش منه حاجه لانه هياخد فاصل فى طرد كل واحده فيكم قالوا لى تصدقى صح المهم دخل المعيد بعد الرست وبدء يشرح استنيت لحد ما وشه بقى لينا ومندمج اوى فى الشرح اللى مش فاهمين منه حاجه وكنت قاعده فى مكان ظاهر اوى وبدءت اتكلم بصوت عالى وملحوظ راح باصص لنا قلت بس هيطردنى راح مشاور لصاحبتى اللى بكلمها قالها انتى اتفضلى بعد اذنك بره السكشن قامت صاحبتى جرى وهى مبسوطه وراحت واخده حاجتها وخارجه جرى ماهو طبعا عز الطلب وانا هطق من الغيظ لكن على مين يا انا يا السكشن قربت من صاحبتى اللى بعدها واتكلمت بصوت اعلى راح باصص لنا وعينه هطق شرار قلت بس احنا الاتنين هيطردنا راح قايل لها انتى كمان بره انتم ايه ما بتتعظوش لازم اطرد السكشن كله سمعت زميلتى اللى ورايا بتقول ياريت واللى اطردت خرجت جرى هى كمان وانا لسه قاعده الموقف اتكرر اربع مرات وكل مره يطردوا هم وانا اللى قاعده لحد ما البنش فضى ما اتفضلش غيرى وكنت خلاص جبت اخرى لازم اشوف حل فجأه موبيلى رن وافتكرت انه فى سكشنه اى حد بيرن موبيله بيطرده قلت احمدك يارب هيطردنى جت من عند ربنا راح باصص وراه وهو مضايق قوى قال موبيل مين دا اللى رن بكل هدوء رفعت ايدى وقلت له انا وفى نفسى بقول دى اللحظه الحاسمه قالى لو سمحت اعمليه سيلنت نزلت ايدى ووشى جايب كل الالوان وحطيت راسى على البنش بعد ما فقدت الامل انى ممكن اخرج راح قالى انتى مش فاهمه قلت له لا قالى امال مش مركزه ليه قلت له اصلى بصراحه تعبانه وعايزه اروح قالى اوى اتفضلى بصيت له كدا ما كان من الصبح قالى وواضح انك ملتزمه وعايزه تفهمى والدليل على كدا ان مفيش حد فاضل فالبنش من اصحابك غيرك لو احتاجتى تفهمى اى حاجه ابقى اسئلينى فيها قلت له انا نفسى اسئل سؤال واحد قالى اتفضلى قلت له هى النضاره دى ماركتها ايه بص لى بثقه اوى كدا قالى دى ايطالى وغاليه فعلا شيك مش كدا قلت له فعلا العيب اكيد فى الدكتور قالى نعم قلت له ابدا الدكتور بتاعى هو اللى ما قاليش على ماركه نضاره شيك ذى دى وخرجت من السكشن لقيت اصحابى اللى اطردوا كلهم روحوا وانا اللى هروح لوحدى وطبيعى الصداع كان لازم يروح لانه طلع ولا حاجه بالنسبه للشلل اللى شفته فى السكشن جوا

كل سنه وانت طيب

تحيه طيبه ياوالدي الطيب

الله يطول عمرك يا غالي يا حبيب

أكتبلك رساله حب

يا غالي يا أطيب أب

وصت عليك الشرايع

وموصى عليك الرب

ياللي رضاك عليا أحلى وأغلى هديه

تحيه

تحيه طيبه ياوالدي الطيب

الله يطول عمرك يا غالي يا حبيب

تحيه لصبرك لشيبه شعرك

لرفيقه دربك امي .. امي حبيبه عمرك

بوسه لدبنك المحبوب .. بوسه لحبك الخالد

غازل علم العشاق

حب هذا الزمان بارد

ياللي رضاك عليا أحلى وأغلى هديه

كبرت بظلك .. أحبك أجللك

وتحبك أكتر امي .. أمي حبيبه عمرك

جالس حولك الأحباب ولا مثلك ملك جالس

تنزل على الجرح ويطيب ... هيبه وربنا الحارس

ياللي رضاك عليا أحلى وأغلى هديه

تحيه
من اجمل ما غنى كاظم الساهر

كل عيد حب وعيد ميلاد وانت يارب بالف خير وصحه وفى وسطينا ومنور الدنيا علينا ومتحمل متاعبنا وحكاوينا عارفه اننا متعبين وانا بالذات عنديه ودماغى ناشفه ديما وكتير اوى بصمم على اللى فى دماغى بس اعمل ايه ما انا طالعه لك ودا بجد شرف ليا وعارفه أد ايه بتخاف عليا حتى من النسمه اللى معديا بدعى ربنا يحنن قلب اللى هيكون زوج المستقبل عليا ويكون ذيك او حتى عنده شويه من الحنيه اللى عندك وخوفك عليا ربنا يخليك لينا وتفضل مالى دنيتنا علينا ومضلل كدا يارب علينا ولآخر العمر فى وسطينا

كل سنه وأنت احلى واجمل وأطيب أب وحياتنا معاك حب فى حب فى احلى عيد حب يا أحن أب

مواقف لا تنسى 3(القتل الرحيم

الموقف دا ما انسهوش من اخر ترم فى آخر سنه فى الكليه كان المفروض بنكون موجودين فى مكان للتدريب فى قسم الجراحه بنستقبل اى حاله تدخل ونتناقش مع الدكتور ويبدء يعالجها قدامنا ولو الموضوع بسيط ممكن احنا اللى نعالج الحاله تحت اشرافه واحنا موجودين اليوم دا جت لنا حاله لقطه قطعت قلبنا لانها كانت مصابه فى حدثه عربيه فكانت النتيجه انها اتصابت بشلل فى الطرف الايمن الامامى وغنجرين او تسمم دموى فى الطرف الايسر الخلفى طبعا الحاله صعبه فقال الدكتور اكيد كلنا عارفين العلاج الوحيد وهو بتر الطرفين فطبعا كلنا سكتنا تماما معنى بتر طرفين لحيوان وعكس بعض يبقى خلاص اعدام ليه فقال وفى حل تانى اكثر رحمه فى نظرنا فسئلته بسرعه وايه هو يا دكتور قالى دا قتل اسمه القتل الرحيم لان الحيوان دا طول ماهو عايش بيتعذب فدورنا اننا نريحه قلت له ازاى برضو يادكتر قالى هنحقنها حقنه هوا بعد ما نستأذن صاحبتهاوبعدها هتنتهى حياتها فى لحظه قلت له ممكن اقول رأيى قالى اتفضلى قلت له مع احترامى لرأى حضرتك مفيش حق لمخلوق انه يحكم على مخلوقات ان حياته خلصت لحد كدا او انه تعبان ولازم اريحه كفايه عليه كدا طول مالسه للحيوان دا عمر يبقى من حقه يعيشه لحد ما العمر ينتهى رد عليا الدكتور قالى انا كدا بريحها من الالم وبريح اللى حواليها من التعب والزعل عليها وانتى برضو يا دكتوره لازم تتعملى كدا رديت قلت له مع كامل احترامى لاختلاف وجهات نظرنا وطبعا مع الفارق العلمى والخبرات لكن انا شايفه ان الحيوان ده ما ارتكبش جريمه فى حق حد ولا وجوده بايد حد فينا ولا أبدا ممكن نكون أحن عليه من اللى خلقه وهو قادر يريحه مش أحنا رد عليا أنا مش هدخل فى النواحى الدينيه انا بنصحك نصيحه علميه عشان يوم لما تكونى دكتوره وعندك عياده ومسئوله عن روح تقدرى تحكمى صح فقلت له شكرا لحضرتك على النصيحه لكن برضو يوم ما يكون عندى عياده واتحط فى نفس الموقف هديها فرصه تعيش لحد آخر يوم فى حياتها وفعلا حقنها الدكتور حقنه هوا فى القلب مباشره وبعد لحظات بالظبط كانت بدءت التشنجات وماتت وانا للاسف بعد كل الكلام اللى قاله ما قدرتش أمسك دموعى على الروح اللى اتحكم عليها فى لحظه من مخلوق ذيها بالاعدام خلص الدكتور وندا عليا قالى بصى يمكن صغر سنك وقله خبرتك هى اللى مخليه مشاعرك تغلب عقلك لكن انصحك نصيحه بنصحها لبنتى اتنين عشان يكونوا ناجحين فى شغلهم لازم يفصلوا عواطفهم عن عملهم ويدوا لمشاعرهم اجازه فى الشغل عارفه مين؟بصيت له وعينى كلها دموع قلت له مين؟قالى الدكتور والقاضى لازم يعرفوا أن الشغل شىء والمشاعر شىء قلت له اسمح لى يا دكتر الدكتور انسان قبل ما يكون دكتور والانسان من غير مشاعر عمره ما يبقى إنسان وبالتالى لا يستحق ان يكون دكتور وخصوصا فى مهنتنا اللى الحيوان فيها ما بيقدرش يعبر يعنى لو ما حستهوش عمرى ما هعرف بيعانى من ايه و لحد انهارده بسئل نفسى الدكتور هو اللى كان على حق ولا تفكيرى انا اللى كان على حق

مواقف لا تنسى 2(ننوس عين ماما

ننوس عين ماما

تحديث :ادعو لاجمل اخت زى الهواااااااااااااااااااااا انه ربنا يشفيها بتدلع وتعبانه حبتين ربنا يشفيكى ياقمرايا ويعفو عنك

السلسه دى كلها مواقف حصلت فى حياتى وما تتنسيش وانهارده الحلقه التانيه ما انساش ابدا يوم ما كنا راجعين انا وصاحبتى من امتحان فى آخر ترم وانا اصلا لما بيكون عندى امتحان ممكن افضل يومين صاحيه واخلص امتحان تالت يوم على الساعه تسعه يعينى ببقى راجعه مش شايفه قدامى اصلا المهم لما صدقت انا وهى وصلنا محطه المترو وما صدقناش نفسنا لما ناس قامت وقعدنا ولا كأننا لقينا كنز واندمجنا اوى فى الكلام عشان ننسى التعب وفجأه اتفزعت انا وهى بعد ما لقيت قلم سخن محترم نزل على وشها خلاوشها كله احمر وعنيها دمعت انا وهى اتلفتنا فى غيظ يكفى بلد أتارى اللى عمل العمله السودا دى طفل ما كملش خمس سنين ومامته بكل برود قالت له بس ياحبيبى كدا عيب بصينا لها كدا واحنا عايزين نقوم نخنقها وقدرت اهدى صاحبتى وقلتلها معلش طفل اعتبريه اخوكى ياستى وياريته سكت بقى لا دا اشتغل لنا فى الازرق قعد يلعب الخفيف ويلف ويدور بين الكرسين اللى اصلا ما فهمش اى مسافه ومصمم الجميل انه يتفرج من الشباك وهرس رجلينا خمستاشر مره ومامته يا خواتى ميته من الضحك على خفته دمه شربات مكرر ياناس كله كوم ولما ادتله سندوتش تقريبا كان مربى وبدء ياكل وهو بيلعب وبهدل نفسه وفجأه وايده كلها منبى جاى عجبه الرسم اللى على كشكول وحط ايده على الكشكول اتاخرت ايده كدا شويه قلت له بس ياحبيبى وهو الرسم شاده اوى ومصر يلعب مع توم وجيرى وهو بياكل السندوتش بس يابابا حاسب ايدك كدا ياتوتو كدا كخ ياقمر انا اصلا بتجنن لما حد يمسك كشاكيل وايده نضيفه ما بالكم بقى بالمنبى المهم شويه وانا وصاحبتى هنطق فكرت نقوم بس السكه لسه طويله واحنا اساسا ميتين من التعب وانا مش ممكن استسلم ياأنا يا توتو الجميل ده شويه وكانت لازم تختمها راحت مامته مدياله شوكولاتايه وهنا كانت الكارثه ياكل حته ويوقع حته وايده كانت خليط من المربى بالشيكولاته العجيبه والاعجب ان مامته مبسوطه اوى وسيباه يلعب ويخنق الناس ولا هى هنا قمر يا اخواتى تقولوش قرد مسلسل وجيه بالخليط التحفه اللى فى ايده وعايز يمسك كشكول تانى عليه عصافير ما هى سينما الاطفال بتاعتى عجبته انا اتنرفزت وقربت اتجنن وقلت حاضر انت بقى عاملى عيل انا اعيل منك ومن عشره ذيك وجدتها خليته بعد شويه وانا فكيت طرف السلك بتاع الكشكول وخليته مدبب وسندت دماغى على كتف صاحبتى قال يعنى نايمه هو اول ما شافنى نمت اقتنص الفرصه وجيه جرى عشان يلعب فى الكشاكيل براحته اول ما لمس الكشكول اتحركت حركه فجائيه راح السلك مخربشه فى ايده المتغمسه منبى بالشيكولاته راح مصرخ وادى جزاء اللى يفتكر نفسه اعيل منى نياااااااااااااااه وانا ولا كانى هنا عملت نفسى رايحه فى سابع نومه وهو يعيط ويبص للكشكول واخيرا قعد جنب مامته ما اتحركش تانى بعدها جينا ننزل رحت شداه من خده بغيظ بعد ما كانت مامته اتكرمت ومسحتهوله قلت لها عسل الامور ربنا يخليهولك قالت لى وهى منشكحه اوى قال يعنى جايبه ملاك ربنا يرزقك بواحد ذيه وانا قلت فى سرى لو بالعينه دى تبقى العذوبيه ارحم

sorry we should open

كنت أمر منذ ايام بالمدونات التى احببتها وأعتدت المرور عليها فامتلكتنى الدهشه لما وصل إليه الحال ,اكثر ما أحزنى مدونه الاخ الكريم والمدون العزيز/تامر الحسينى عندما وجدت آخر موضوعاته وقد كتب فيه نهايه حلم انسان عاشق حر فكان ولابد ان ارد عليه كأخت ومدونه وأقول له ان الحلم ليس له نهايه فكثيرا ما تقسو علينا الحياه وكثيرا ما نتألم وما أكثر ما تترك بداخلنا آثار وذكريات أليمه لا نستطيع نسيانها ولكن كل هذا لا يعنى ان نغلق قلوبنا ونقتل بداخلنا احلامنا ولكننا قد اعتدنا منك اخى الكريم ان نجدك ومدونتك دائما فاتحى الأذرع والابواب على مصراعيها ووجدناك دائما قدر المسئوليه التى اخترت ان تحملها منذ البدايه يوم بدءت الحلم ودخلت التدوين فلا يمكن أن تتملص منها الآن بتلك السهوله او تحت أى ظرف وتترك مكانك فارغا ولا يعقل انه كلما تقسو علينا الحياه أن نتوقف ونترك احلامنا ونختبىء من الامنا فاعلم أخى انه قد يكون الليل طويل ولكنه من المؤكد بدايه لنهار جميل مشرق واوقات كثيره تترك فينا الأيام خطوط عريضه ,وآثار مؤلمه فتكون أكبر دليل على قصه كفاحنا فاسمح لى ان أدعوك بكل أمل أن تفتح للدنيا عينيك وعد وأفتح من جديد قلبك للحياه فمازال فيها أيام أفضل قد تكون لم تحياها بعد ولكنها حتما قادمه واقولها لك

SORRY WE SHOUD OPEN AS WE HAVE DREAMS AND MUST CATCH IT

اما بقى اجمل أخت وأرق سمايلى وأعذب زهره فى التدوين رئيت واحسست بها فى آخر موضوع لها أنها تتألم وبداخلها جرح كبير فأقول لها أسمحى لى أشعر بك وبما تعانين وأشعر وكأننى مكانك وأعانى ما تعانيه ولكن إن توقفنا عند كل جرح حتى ولو كان عميق وظللنا نبكى وننظر خلفنا فلن نرى ابدا الدنيا أمامنا وستمضى الحياه بدوننا ولكن أعلمى حبيبتى ان الحياه يوم جرح ويوم فرح فمهما طال الجرح فلابد ان يملأنا الأمل بأن الفرح آتى وأن الله حتما سيعوضنا بكل خير وبقدر احتمالنا وصبرنا وسيأتى يوما من يعوضك كل ما رأيتى من الالام ويعوضك بأجمل امال واحلام

اما عن أجمل وارق ملاك فهى حقا ملاك فقد اختفت منذ فتره وليس لها جديد ولا استطيع الوصول اليها وكذلك اخى الكريم حلم فقد انقطعت الصلات بمدوناته واتمنى من الله ان يكونا بكل خير

اما بقى اجمل انوسه وحبيبه قلبى حقا ألمنى بشده واشعر حقا بألمك وما تعانين وكذلك اخى الكريم أقدم عاصمه فى الحب شعرت بألمه فى آخر موضوعاته ولكن اذكركم بأن الله إن وضع فى قلوبنا بعض الأحزان ليختبر مدى صبرنا ويبتلينا أنصبر أم نجزع فاعلموا إنه رؤوف رحيم وهو قادر على ان يبدل كل احزانكم سعاده وأمل فقط لاتفقدوا أبدا الثقه بالله

وايضا اخى العزيز لا تشتاق حقا جعلتنا نشتاق لكتاباتك وموضوعاتك وكلامك الممتع

وحقا من تتكلم هى أكثر من توجعت من الدنيا وعانت من قسوتها ولكنى يوما لم أفقد الأمل والثقه فى رحمه الله

لكم منى اخوتى واخواتى الاعزاء جميع المدونين من ذكرته ومن لم اذكره خالص الموده والحب واسمحوا لى تلك رساله حب لهؤلاء المدونين ولفته صغيره اليهم وأتمنى ألا اكون قد تطفلت عليهم وهو ليس بوست تقليدى فارجو ان تتحملونى

أختكم فى الله :دهب(كتكوته الشقيه

أمتى هنفوق؟

بجد مش عارفه هنفضل لحد أمتى نايمين كدا ومستنين لما يظهر مصل لوباء انفلونزا الخنازير اللى بقى خلاص وباء عالمى وكل دوله من الدول المتقدمه بتفكر وبتنافس عشان تنتج افضل مصل بأقل أثار جانبيه وبأرخص تكلفه واحنا بكل بجاحه مستنينهم لما ينتجوا عشان نقف فى طابور الدول الفقيره ويا صاب يا خاب المصل معانا ليه وصلنا للاحنا فيه دا كله؟ بعد ما كنا دوله زراعيه صناعيه بنصدر معظم المنتجات تحولنا لدول مستهلكه بتستورد كل المنتجات على الاطلاق ليه فقدنا الانتماء للدرجه دى لدرجه ان حتى منتخب الناشئين اقصد الفاشلين اللى اتصرف عليه ملايين حتى مش عارف يلعب على ارضه ليه كل عالم قفل معمله وكل فلاح ترك فاسه وكل عامل خرج من مصنعه وكل طالب ساب قلمه ليه ونسى علمه ليه كل شيخ وداعيه بدل ما يقف ويجمع الامه انشغل فى توزيع السباب واللعنه على زملائه ليه نسينى دورنا وتوهنا ورضينا اوى باننا ناكل ونشرب وننام واستكفينا بالسهل ونسينا اى واجب علينا ليه نسينا اننا هنتسئل على كل كبيره وصغيره فى حياتنا هنقول ايه لربنا وهو بيسئلنا كنتم فين والغرب بيزرعوا وينتجوا ويصدروا ويفكروا وانتم واقفين يادوب تستهلكوا وتتفرجوا ,ومصدرين للدنيا ضهركم وسايبنها تمر ولا انتم هنا بلاش دوله ذى الصين اللى الناس فيها اكتر من حبات الرز ليه ينافسوا فى انتاج مصل ليه اصبحوا دوله منتجه لكل شىء بعد ما كانوا لا شىء وظهروا من لاشىء أمتى هنقف ايد واحده ونرجع نخاف على بلدنا ونتنافس على اداء ادوارنا امتى المصانع هترجع تدور والفؤس ترجع تشق الاراضى والآمال ترجع تملى النفوس وشيوخنا يرجعوا يقفوا يدعوا بنفوس صافيه وصدق نيه وفى صف واحد واحنا بكل صدق نأمن وراهم عشان بلدنا ان ما كانش دا وقت الوقوف أيد واحده فى مواجهه وباء المرض ووباء ما يحدث لقدسنا الغالى الحبيب ووباء ما حل بنفوسنا من ضعف وهوان فمتى نستيقظ ونحاول الوقوف؟سؤال مش لاقيه له اجابه